Senatuko Euskal Taldearen bozeramaile Estefania Beltran de Herediak baieztatu du EAJ prest dagoela Kataluniako gatazka politikoa desjudizializatzeko arau bat egituratzeko bidean lan egiteko. XV. legegintzaldiko lehen osoko bilkuran, PPk Kataluniako prozesuaren auzian amnistia ematearen aurka aurkeztu duen mozioaren eztabaidan, Beltran de Herediak berretsi du "izaera politikoa duen gaia dela, erantzun politikoak eskatzen dituena; konponbidea elkarrizketaren, negoziazioaren eta akordioaren bidez bideratzea eskatzen duena. Auzi politikoak ez dira konpontzen epaitegietara eramanez, ezta zigor-kodea gogortuz ere ".

Bere hitzaldian, bozeramaile jeltzaleak PPren jarrera paradoxikoa agerrarazi du; izan ere, 2012an amnistia fiskala sustatu zuten eta Jose Maria Aznar izan delako indultu gehien sinatu dituen Gobernuko presidentea. "Argi uzten duzue ez dela ‘zer’ eztabaidatzen, ‘zertarako’ baizik, nabarmendu du. Hala, Konstituzioak amnistia legerik jasotzen ez duela dioen popularren argudioa ezeztatu du. "Debekatzen al du? Espainiako Konstituzioan ez dut artikulu edo atal bakar bat ere aurkitu Gorte Nagusiei amnistia lege bat onartzea debekatzen dienik ", ziurtatu du.

Beltran de Herediak PPk bultzatutako "borroka eta polarizazio soziala" deitoratu du, herritarrei protestara deituz. Adierazi duenez, "posible bada Kataluniako gatazka desjudizializatzeko arau bat artikulatzea, bizikidetza eta kohesioa sendotzen laguntzeko, egin behar dugu. Era berean, PPk Kataluniako gatazka zigor kodea gogortuz konpondu nahi izatea kritikatu du, eta ohartarazi duenez, "saiatzen diren arren, ezingo dituzue inoiz Herri baten sentimenduak baztertu, ezta Historia ezabatu ere". Hori dela eta, talde nagusiari adierazi dio ezin zaiola bizkarra eman "Espainiako Estatuaren errealitateari: estatu eleaniztuna, kultura anitzekoa, kide izatearen sentimendu desberdinak dituena, eta autonomia-erkidegoen eta Estatuaren arteko finantzaketa- eta harreman-sistema desberdinak dituena".

EAJ-PNVko bozeramaileak agerian utzi du, Espainiako Estatua Estatu konposatua eta anitza den arren, "horrela aitortu beharrean, berdintasun konstituzionalaren printzipioan ezkutatuz uniformizatu nahi duzuela". Beltrán de Herediak, amaitzeko, esan du "lurralde-ereduaren eztabaidari eta Estatuaren nazio aniztasunaren aitorpenari ekiteko garaia" dela. Inork ez dezala zalantzarik izan EAJ-PNVk euskal nazioaren aitortza eskatzen jarraituko duela ".