EAJ-PNVko senatari Igotz Lopezek salatu du euskal hiztunen hizkuntza eskubideak ez daudela bermatuta esparru judizialean Euskadin, administrazio publikoetan euskararen trataerari buruzko epaiei erreferentzia eginez, eta Espainiako Gobernuari gogorarazi dio eskualdeetako edo eremu urriko hizkuntzen Europako Gutunarekin bat egiteak hizkuntza horien erabilera aktiboki sustatzeko konpromisoa eragiten duela. Espainiako Gobernuari kultura bultzatzeko eta babesteko eskatu zion mozio baten eztabaidan, senatari jeltzaleak euskara "gure altxor kultural handiena" dela aldarrikatu du.

Lópezek agerian utzi du Gutunaren helburua Europako hizkuntza gutxituak babestea eta sustatzea dela (Estatua 2001ean atxiki zitzaion Gutunari), eta, horren ondorioz, hizkuntza horien erabilera sustatu behar dela justizian eta baita hezkuntzan, administrazioan, komunikabideetan, kulturan eta esparru sozioekonomikoan ere, baina arlo judizialean "sentsibilitate handia falta da gai horri heltzeko".

Ordezkari jeltzaleak "gure bizitza euskaraz garatu ahal izateko eskubidea" aldarrikatu du, eta bere erabileraren normalizazioan aurrera egitea planteatzen den bakoitzean gaztelania desagertuko den beldurrarekin topo egiten duela deitoratu du. "Gure ama-hizkuntzari eutsi nahi diogu, gure kultura-altxorrik handienari, baina ez dugu ikasitakoa galdu nahi, mundura irekita egon nahi dugu. Euskara, jalgi hadi mundura!". Era berean, adierazi duenez, "elkarbizitza gainerakoen aintzatespenetik eta errespetutik hasten da, diren bezala. Euskaldunen kasuan, gure kulturarekiko eta gure kultur adierazlerik handienarekiko errespetuagatik, gure hizkuntzarekiko, euskararekiko, gure kulturaren arimarekiko eta nortasun nazionalarekiko errespetuagatik ".