Beatriz Artolazabal zinegotzi jeltzaleak adierazi duenez, joan den martxoaren 20an Arabako Batzar Nagusiek aho batez –PPk ere bai– erakutsi zuten Alfonso Alonso alkatearen jarduketarekiko desadostasuna, El Pilar zentro soziokulturaleko garbiketa-zerbitzugintza minusbaliatuekin egiteari ez eusteagatik. Horrezaz gainera, garbiketa eta mantenimendu arloan egitekoak diren kontratazioetan Udalak arestion aipatu den kolektiboa laneratzeko helburua bete dezala eskatu zuten Batzar Nagusietako taldeek.

“Argi eta garbi dago alkatea eta beronen udal taldea direna minusbaliatuentzako enplegua sustatu behar dela ulertu ez duten bakarrak. Are, Aldundian ari diren PPko kideek ere haien aurka jarri dira eta belarrietatik tiratu diete El Pilar zentroan egin dutenagatik, hots, enpresa bat kontratatu eta lan hori egiten ari ziren minusbaliatuak alde batera uzteagatik”, azaldu du Artolazabal jeltzaleak.