Malentxo Arruabarrena zinegotzi nazionalistak azaldu duenez, “landare-hondakinak kalitaterik onenekoak dira, konpostgintzaren bidez aprobetxatzeko, baina gaur egun hondakindegira eramaten dira aldez aurretiko inolako tratamendurik gabe”.

Hondakinen gaikako bilketaren ildoan aurrera egiteko, EAJk materia organikoaren birziklapena indartu nahi du, konpost bihurturik gerora ongarri gisa erabili ahal izateko. “Gure hirian gero eta etxebizitza gehiagok dauzkate beren berdegune txiki eta lorategiak, Ibaiondo, Arriaga, Salburua eta Zabalgana auzoetan”, argudiatu du zinegotziak. Aldi berean, konpostgintzaren bidez aprobetxatzeari dagokionez, egiaztaturik dago lorezaintzako lanetan sortutako landare-hondakinak direla hiri-hondakinik interesgarrienak.