Iñigo Antia zinegotzi jeltzaleak hauxe adierazi du: “Gure ustez erabat zentzugabea da alkatea zezen-plaza kosta ahala kosta inauguratu nahi izatea, obrak zertan diren ikusita. Izan ere, nahiz eta obrak garaiz bukatu eta barrunbea hala-moduz zezenketetarako prest egon, beldur gara haiek amaitutakoan ez ote den hutsik egongo urte guztian, bai eta datorren urteko denbora gehiena ere. Zezenketak antolatzeaz aparte, gobernu taldeak oraindik ez daki zer egin erabilera anitzeko barrunbearekin. Akustika antzeko plaza estalietakoa bezalakoa bada, Jazzaldia Mendizorrotzan izango da, ohi bezala. Gainera, ez dago aurreikusita kirol edo kultur jarduera iraunkor baten egoitza izatea. Miraria gertatzen ez bada, barrunbe berria PPren ideia faltaren monumentua izango da”.