Bozeramaile abertzaleak adierazi du kaleetako zoladura negargarria dela. Bere ustez, beharrezkoa da arin jokatzea; izan ere, urtetako arazoa da eta, hala ere, ez zaio irtenbiderik eman, hiriko enpleguaren % 30 baino gehiago biltzen duen gure ekonomiako sektorearen irudia kaltetzen duen arren.

Mikel Martinezek gogorarazi du 2003an Arabako Enpresaburuen Sindikatuak, udalak hala eskatuta, industrialdeetan jarduteko arazoei eta gomendioei buruzko azterlana egin zuela. EAJren bozeramaileak esan duenez, “txosten interesgarri horretan, enpresen ustez enpresa alde horietan gabezia nagusienen artean zeuden zenbait alderditan jarri zen arreta gehien. Horien artean, besteak beste, barne irisgarritasuna, bideen egoera, garbiketa, seinaleztapena, garraio publikoa, segurtasuna eta larrialdietarako mediku zerbitzuetarako sarbidea nabarmentzen ziren”.