“Berriro ere, diru-sarreretan antzematen den defizit orokorra orekatu nahi dute OHZa neurriz gabe igoz. Erabat bidegabekoa den neurria izateaz gain, gauzak modu horretan egiteak are sakonagoa egiten du udaleko zerbitzuen emakidaren zulo ekonomikoa”, adierazi du Ogasun esparruko bozeramaile jeltzaleak.

Egoera hori zuzentzeko, EAJren Udal Taldeak Ondasun Higiezinen gaineko Zergaren hurrengo ordainagiria bere horretan uztea proposatu du, ia % 10era iristen den igoera proposamena deuseztatuz. “Igoeretan martxa hori hemendik 2012ra mantentzea erabat ezinezkoa da. Joan den urteko igoera izan zen jada benetako kolpea errenta baxuentzako, hobariek arintzea lortu ez dutena. Ez dugu nahi bidegabekeria bat dena berriro ere errepikatzea.” EAJren zuzenketek ere, ez dute igoerarik proposatzen udaleko gainerako zergetarako.