Orain dela urtebete baino gehiago, 2005eko irailean hain zuzen, Gizarte Gaietako foru diputatuak eta lehendakaritza zinegotziak adierazitako ekimena aurkeztu zuten. Horren bidez, esparru berean bildu nahi ziren egun tratu txarren biktimei zuzenduriko foru eta udal zerbitzuak. Ordudanik, ez da berririk izan proiektu horren gainean.

“Azpimarratu behar dugu, Udala eta Aldundia ekimen hori agintzen aritu direla legealdia hasi zenetik. Behar bezain beste denbora egon da egun eskaintzen diren zerbitzuen baldintzak hobetzeko, batez ere kontuan hartuta, etengabeko salaketak egon direla erakundeen esku-hartze eskasa salatuz hain sentikorra den kontu batean. Salaketa horiek talde politikoetatik nahiz Berdintasun Kontseiluan ordezkaturiko elkarteetatik iritsi izan dira”, baieztatu du Malentxo Arruabarrenak, Eusko Alderdi Jeltzaleko zinegotzia.