“Urte erdia daramagu argibide eske, baina hirigintza zinegotziak gaia saihestu besterik ez du egiten. Joan den urriaren 17an Jose Mardoneseko BEPBaren Konpentsazio Batzordearekin bildu zen, eta Ibarrondok iragarri zuenaren arabera, gai hori aztertuko zen. Beste hilabete bat igaro da, eta egun oraindik ez dugu erantzunik jaso”, argitu du bozeramaile jeltzaleak, Mikel Martinezek. Horregatik, biharko batzarrean zinegotziari galde egingo dio hartutako akordioei buruz, udaleko lurzorua sustatzaile pribatuei laga izan eta gero.

Jose Mardones kaleko luzapenean eraikiko diren 40 etxebizitzak eta 14 txaletak etengabeko eztabaidan sarturik daude. Lehenik eta behin, planak justifikatu ezin daitekeen lau urteko atzerapena darama, eta oraindik ez dira obrak hasi ere egin. “Hori gutxi balitz, Plana isiltasun administratibo bidez onartu zen, eta ondorenean aldarazi egin zen lur publikoak lagatzeko, etorkizunean bertan biziko direnek sarbide zabalagoa izan dezaten garajeetara sartzeko. Hori guztia txosten teknikoak adierazten zuena adierazita ere adostu zen. Txostenaren arabera, udalaren interesak nabarmenki kaltetuko ziren erabaki hori hartuz gero”, erantsi du Martinezek.