Gizarte Gaietarako zinegotziak arestion aipatu den zerbitzuaren 700 bat erabiltzaileri gutuna bidali die, telealarma hori erabiltzeagatik ez dutela ezertxo ere ordaindu beharko adierazten duena. “Gobernu taldeak azaldu ez duena da zerbitzu hori doakoa dela urte hasieratik, hala erabaki baitzen zerga ordenantzaei buruzko eztabaidan. Erabaki hori orain jakinarazi izanaren arrazoia ondokoa besterik ez da: elektoralismo hutsa. Gure ustez, zeharo lotsagarria da adineko pertsonen beharrizanak botoak eskuratze aldera erabiltzea”, adierazi du Euzko Alderdi Jeltzaleak Gizarte Gaietarako arloan duen bozeramaile Beatriz Artolazabalek.