EAJren militanteekin eta erakundeetako ordezkariekin egindako topaldi batean, Gasteizen, Urkulluk adierazi du nortasunaren gaineko gatazka eta indarkeriarena gauza desberdinak direla, eta terrorismoa ez dela gatazka politikoaren ondorio naturala, gatazkaren perbertsioa baizik. Gasteizko ekitaldian izan da, era berean, Ibarretxe lehendakaria ere.

«ETAk ezin du konponbidea bilatu behar diegun auziei noiz eta nola heldu erabakitzeko pribilejioa izan», adierazi du Urkulluk. Auzi hori EAJk Madrilen Zapatero presidenteari egingo dioten planteamenduaren zati izango dela ohartarazi du Urkulluk. Bere esanetan, Zapatero da hauteskunde orokorren irabazle birtuala.