EBBren idazkari den Belen Greaves eta GBBren presidente den Joseba Egibarrekin batera izan duen prentsaurrekoan, Urkulluk “adierazpen hau denbora tarte laburrean ematen ez baldin bada, EAJk, ANVren ordezkariak dauden Erakunde eta Udaletxe guztietan, mozioak aurkeztuko” dituela adierazi du eta, “ordezkari demokratiko bati eskatu ahal zaion gutxieneko etika eta morala ez izateagatik, ordezkari hauen dimisioa eskatuko du”.

Urkulluren ustez, “bide hauek emaitza egokirik emango ez balute, EAJk beste alderdi politikoekin bildu eta beharrezko erakunde-ekimenak martxan jartzeko jarrera adieraziko du, beti ere, neurri guztiak kontutan harturik, hau da, gaitzespen politikotik zentsura moziora. Horrela, Euskal erakundeak konpromiso etiko eta demokratikotik zuzendurik egotea bermatuko genuke”.