«Alkateak ezin du jardun bozeramaileen azken batzarrean bezala. Horren ondoren, eztabaida irekia zuten gaiak ofizializatu nahi izan zituen. Erakundeen arteko borroka amaitu behar du, baita herritarren artean proiektuaren irudia kaltetzen duen egoera ere», adierazi du bozeramaile jeltzaleak.

Erabakitako ibilbideari egin dakizkiokeen aldaketen inguruan, Abetxukorako iritsieraren eta Angulema kalearen aldaketen berri azkarregi ez emateko eskatu dio Mikel Martinezek gobernu taldeari. Bestalde, Araba Jeneralaren kalean tranbiaren ibilbidearen segurtasunaren inguruko jarrera aldatzeko ere eskatu dio. «Gai horren inguruko manipulazio gehiagorik ez. Orain arte ez da ziurtatu bide bakarreko ibilbidea bide bikoitzekoa baino seguruagoa denik. Eztabaida hori bukatu behar dugu, eta, irtenbide onena bilatzeko arduratuta gaudenez, bere garaian lortutako akordioa defendatzen dugu», azaldu du.