“Esfortzua egin dugu krisi ekonomikoari bermeekin aurre egitea ahalbidetuko digun tresna lortzeko, betiere, udaleko altxortegiari kalte larria eragin gabe. Udaletik egungo egoera ekonomikoan ondorio zuzenak izango dituzten neurriak hartu ditzakegu, eta, EAJren proposamenei esker, funtsezko sektoreak babestuko ditugu: familien ekonomiena eta jarduera ekonomikoena”, azpimarratu du Martinezek. Talde jeltzaleak KPIaren aurreikuspenaren nabarmenki azpitik dauden eguneratzeak planteatzen ditu biztanleen gainean eragin zuzenena duten zerga, prezio publiko eta tasetan. Zentzu horretan, azpimarratzekoak dira ondasun higiezinen gaineko zergan (% 2,77ko hazkundea, gobernu taldeak proposaturiko % 4aren aldean), ibilgailuen gaineko zergan (% 2,75a, % 4aren aldean) zaborren tasan (% 2,5ekoa, % 3,15aren aldean), udal egoitzetan egotearenean (% 2a, iragarritako % 2,25aren aurrean) eta kirol instalazioen ordainketarenean (% 2,5a, % 3,15aren aurrean) proposatu diren murrizketak.