Oposizioko buruak alkateari eskatu dio marketinga alboratzea eta proposamen egingarriei ekin diezaiela. “Atzoko diskurtsoan zehaztapen falta izan zen eta soberan egon zen populismoa, PPren gobernuaren lehen egunetan nagusi izan den  eta guztiz arriskutsu gertatzen den populismoa” adierazi du Urtaranek. Talde jeltzalearen esanetan, udal gobernu berriaren beste ezaugarri bat da gauzak presaka egiten direla “kasu batzuetan ausarkeria politikora iritsi da , BAI Center lurperatzea eta autobus geltokiaren kokapena aldatzearena kasu”. “Hau guztia-gaineratu du- PP alderdia berehalakotasunetik, epe laburretara begiratzetik eta errentagarritasun politiko eta alderdikoitik abiatzen delako, ondorioei erreparatu gabe”. 

Gorka Urtaranek Maroto Gobernuak  aurrekontuetan egin dituen murrizketak aipatu ditu, besteak beste gizarte zerbitzuetan, lan arloan, hezkuntzan eta kulturan “EAJren aldetik akordioetara iristeko ezarri genituen marra gorrien gainetik egin dute”. Baliabide gehiago eskuratzeko xedearekin, bozeramaile jeltzaleak ausardia eskatu dio iruzur sozialaren kontra ez ezik, zerga iruzurraren kontra borrokatzeko, hori berreskura baitaitezke diru kopuru esanguratsuak.