EAJ-PNVk Cándido Ruiz de Garibay ikastetxerako sarbideek suposatzen duten arriskua saihesteko irtenbide bat aukeztu du gaur goizean Euskera, Kultura eta Hezkuntzaren udal batzordean. Ikastetxe horrek Errekabarri ikastetxea hartu du aldi baterako. Egun Azazeta mendatearen kalean dago autobusaren geralekua (ikastetxearen sarreraren aurrean). Ondorioz, autoan datozen haurrak errepidean jaitsi behar dira. Oso tarte arriskutsua da, autoak etengabe pasatzen direlako. Talde jeltzalearen Hezkuntza alorreko bozeramailea den Iñaki Prusillak aurkeztu du Errekabarriko AMPAk egindako proposamena. Autobusak Barazar mendatearen kaleko ikastetxeko aparkalekuraino igotzea planteatzen dute, ikasleak toki seguruan uzteko. Egun ikastetxea aparkalekutik banatzen duen hesia irekitzea ere  beharrezkoa litzateke.

“Aparkalekura sartzeko baimen hutsarekin haurrak errepide erdian jaitsi behar izateak dakarren arriskua saihestea lortuko genuke.  Ikastetxeko gurasoek proposatu digute eta irtenbidea horren sinplea izanda, ez dago atzeratzeko arrazoirik", gehitu du Iñaki Prusillak.