EH Bilduk azalpenik eman gabe jarraitzen du langileen kudeaketarekin eta udal zerbitzu publiko batzuen kontratazioarekin zerikusia duten irregulartasunei dagokienez.

EAJ-PNVren udal taldeak eskatuta deitutako ezohiko osoko bilkurak hainbat udal zerbitzuren kontratazioen egoera irregularra agerian uzteko balio izan zuen. Aramaioko alkatea "ez da gai izan salatutako irregulartasunei buruzko azalpenik emateko",  adierazi zuen EAJ-PNVko udal taldeak atzo, osteguna, arratsaldean egindako bilkuraren amaieran.

Aramaioko alkatea Kultur Etxeko langileen egoera irregularra mantentzen ari da. Une honetan prozedura judizialaren mende dago, azken hamabi urteetan zerbitzu hori kontraturik gabe eman duten bi langileek salaketa jarri ondoren.

Aldiz, alderdi jeltzaleak udal aparejadorearen egoeran jarri du arreta. 2009tik, zuzeneko esleipen baten bidez kontratatzen zen zerbitzu hori. Lan hori egiten duen pertsonak ere salatu zuen Udala, udal langile gisa aitortzeko eskatuz, eta badirudi akordio baten bidez lortu duela hori. Kultur Etxeko langileei, aldiz, ukatu egiten zaie.

Azkenik, epai batek Udala zigortu du Euskara teknikari lanpostuaren esleipena aldatzera. Epaiak berak argi uzten ditu oso kontu larriak: plaza esleitzeko argitaratutako oinarriak ez zirela bete, oinarri hauetan ezarritako baldintzak, abisurik gabe, aldatu egin zirela prozesua hasi ondoren, eta, larriena, plazaren esleipendunak aurreko EH Bilduko alkatearekin zuen harreman pertsonala erabakigarria izan zitekeela plaza esleitzeko orduan. Epaiak aitortzen du salatzaileak plaza izateko eskubidea duela.
EAJ-PNVko udal-taldeak, halaber, landa-dinamizazioko teknikaria pairatzen ari den egoera irregularraren berri eman zuen.

 EAJ-PNVk bere lanerako konpromisoa adierazi du eta EH Bildu, gardentasunik gabe eta modu irregularrean, urte luzez Aramaion garatzen ari den praktikak salatzen jarraituko du, langileentzako oso bidegabeak diren praktikak.