“Proiektu eleaniztunen helburua da ikasle euskaldun eleaniztunak lortzea, derrigorrezko hezkuntza amaitzen dutenean benetako konpetentzia izango dutenak bai euskaraz, bai gaztelaniaz, hala nola maila nahikoa ingelesean edo atzerriko beste hizkuntza batean”. Hori da EAJ-PNVk ezarritako helburua. Horretarako, hezkuntzako bozeramaile jeltzaleak, Jone Berriozabalek, esan du gune bakoitzeko errealitate soziolinguistikoa kontuan hartu beharra dagoela, eta euskara lehenetsiko duen trataera eskaini. “Uste dugu euskara izan behar dela proiektuen ardatz egituratzailea, konpentsatu beharreko desoreka sozialean baitago”.

Berriozabalek defendatu duenez, beharrezkoa da proiektu eleanitzak ikastetxe guztietara hedatzea, eskola bakoitzaren autonomia errespetatuta. Horretarako, irakaskuntza eleanitza orokortzeaz gain, ezinbestekoa da irakasleen hizkuntza eguneratzea eta hizkuntzen formakuntza didaktikoa; baita Lanpostu Zerrenden hizkuntza baldintzak, hurrengo Enplegu Eskaintza Publikoetako lanpostuetarako ingelesezko hizkuntza gaitasuna eskatzeko. “Pixkanaka lanpostuen zerrendak aldatzea proposatzen dugu, ikastetxeetako hizkuntza proiektuetatik eratorritako beharrak aintzat hartuz. Horrela, ingelesez ere eskolak emateko gaitasuna duten irakasleak sartzen joango gara. Hori da modua atzerriko hizkuntzan ere irakasteko prestatuta dauden irakasleak sartzea bermatzeko.