Gaur arratsaldean egin da Arabako Ur Partzuergo berriaren lehen bilera, eta han izan dira partzuergoari atxiki zaizkion 74 toki erakundeak. Zehazki, guztira 9 udalek, 64 administrazio batzarrek eta Arabako Foru Aldundiak onetsi dute ur partzuergo berria abian jartzea, zeina kiderik gehien duen partzuergoa baita Araban.

Uraren ziklo osoa modu eraginkor eta jasangarriagoan kudeatzeko helburuarekin ekin dio bideari partzuergo berriak. Izan ere, ura kudeatzeko bestelako eredu bat ekarriko du lurraldera, eta indarrak batuko dira horniduraren, ura edateko on bihurtzearen, estolderiaren eta uraren arazketaren kudeaketan.

Gaur arratsaldetik bertatik aurrera, partzuergo berriko kide izango dira honako hauek: Añanan, Berantevilla, Erriberagoitia, Erriberabeitia, Gaubea eta Gesaltza Añanako udalak, eta Acebedo, Antezana, Anuntzeta, Armiñon, Arreo, Barrio, Basquiñuelas, Berantevilla, Karkamu, Komunioi, Corro, Espejo, Estavillo, Jokano, Lacervilla, Leziñana, Morillas, Ozio, Pinedo, Pobes, Zabalate, Quintanilla, Quintanilla Erriberabeitia, Ribabellosa, Sobron, Tuesta, Valluerca, Villanañe, Uribarri Gaubea, Biloria eta Zambranako administrazio batzarrak; Gorbeialdean, Betolatza, Dura, Elosu, Landa, Luku, Mendibil, Uribarri Ganboa eta Zurbaoko administrazio batzarrak; Lautadan, Agurain, Dulantzi eta Burgeluko udalak, eta Añua, Arbulu, Argomaiz, Egileta, Burgelu, Gauna, Gazeta, Gereñu, Ixona, Mendixur, Oreitia, Trokoniz eta Txintxetruko administrazio batzarrak; eta Kanpezu-Arabako Mendialdean, Haraneko Udala eta Alta, Angostina, Antoñana, Apinaiz, Kontrasta, Maeztu, Montoria, Oteo, Sabando, Done Bikendi, Uribarri Harana eta Villafriako administrazio batzarrak. Horiez gain, partzuergo berriko kide da Arabako Foru Aldundia ere, zeinak figura berri horren sorkuntza babestu baitu.

iturria fuente: arabapress.eus