Sahararekiko elkartasunerako euskal karabana gaur goizean aurkeztu da Eusko Legebiltzarrean, SEADen Lagunen Elkarteko ordezkariek, Saharako ordezkariak Euskadin, Euskal Fondoak eta "bakea eta askatasuna saharar herriarentzat" talde parlamentarioak parte hartu duten ekitaldi batean. Ekimenak euren lurretatik desplazatutako milaka sahararren sufrimendua arintzea du helburu, Marokok legez kanpo okupatuta, galkorrak ez diren elikagaiak bidaliz, hala nola arroza, pasta, lekaleak eta azukrea eta konpresak. Otsailaren 29an abiatuko da karabana Donostiatik, eta bederatzi kamioik osatuko dute. Jone Berriozabal legebiltzarkide jeltzaleak adierazi nahi izan du ekitaldi honetan EAJ-PNVk babesa eta errekonozimendua eman diola Saharako errefuxiatuen bizi-baldintzak hobetzeko kanpaina solidario honi.

"Errefuxiatu guneetan bizi diren pertsonak kanpoko laguntza humanitarioaren menpe daude. Saharako biztanleen elikadura-segurtasuna eta nutrizioa bultzatzen ditugu, eta horregatik dira garrantzitsuak gaur aurkezten ditugun ekimenak ". Berriozabalen esanetan, Saharako gatazka, gainera, existitzen den zaharrenetakoa eta ahaztuenetakoa da. Horregatik, funtsezkoa da horren berri ematea, errefuxiatuen oinarrizko premiak asetzeko behar den laguntza biltzeko. "Guztion artean bizirik mantendu behar ditugu gure elkartasun eta justizia sozialeko balioak, elkartasun horrek ahalbidetuko baitu haien bizimodua hobetzea. Zuen herriaren egoera ikusaraztea, berehalako beharrei erantzutea eta gatazkari bidezko konponbidea bilatzea ahalbidetzen duten ekimen guztietan gure babesa izango duzue beti", esan du. Era berean, Berriozabalek Fronte Polisarioak Euskadin duen ordezkaritzak, elkarteek eta herri honen egoeraren berri emateko lanean ari diren pertsona guztiek egiten duten lana azpimarratu du, bere kausak agenda politikoan presente egoten jarrai dezan.

Saharar herriaren determinazio askea bermatuko duen konponbide "baketsu, justu eta behin betikoa" eskatu du berriro legebiltzarkide jeltzaleak. "Haien aldarrikapen zilegi eta justua babesten dugu, eta nazioarteko ebazpenak betetzea eta nazioarteko legezkotasuna Mendebaldeko Saharan aplikatzea exijitzen dugu. Urte asko dira borroka baketsu eta erresistentziaz beterik; Euskal Herria beti egon da zuekin, eta egoten jarraituko du ".