Eusko Legebiltzarreko osoko bilkurak ostegun honetan onartu du Giza Eskubide, Berdintasun eta Justizia Batzordeak egindako irizpena, adingabeen aurkako sexu-abusuen kasuetan prebentzioa, egia eta erreparazioa lortzeko proposamenak egiteko azterlan bat egiteari buruzkoa.

EAJ-PNVko legebiltzarkide Eva Juez Garmendiak nabarmendu du irizpen honek Legebiltzarreko txostenean jasotako gomendioak jasotzen dituela, eta egindako azterketaren helburu nagusia adingabeei egindako sexu-abusu kasu bakar bat ere ez gertatzea dela. "Hori lortzeko, sinetsi, entzun eta behatu egin behar ditugu", adierazi du.

Hala, azterlanak argi uzten du haurtzaroan edo nerabezaroan gertatutako sexu-abusuek bizitza osoan irauten duten ondorioak sortzen dituztela, eta, beraz, biktimek ezin dutela helduaroa normaltasunez eraman, bizi izandakoak, jasandakoak, gizarte-harremanetan, lan-bizitzan eta amatasun edo aitatasunean eragiten dielako. "Bizitza baldintzatuak, sufrimendu handiko bizitzak, damuak dituztenak, erru-sentimenduak dituztenak, eta, beraz, biktimentzako arretak integrala eta espezializatua izan behar du", esan du Eva Juezek.

Ildo horretan, jeltzaleen ordezkariak funtsezkotzat jo du prebentzioa, haurrei, nerabeei, familiei eta haiekin guztiekin harreman estuan lan egiten duten profesionalei prestakuntza eta informazioa emanez. "Garrantzitsua da beharrezko tresnak eta baliabideak ematea; izan ere, haurtzaroan edo nerabezaroan sexu-abusu bakar baten larritasuna muturrekoa da; neurri handiagoan edo txikiagoan, ondorioak bizitza osorako dira. Arazo psikologiko eta fisikoak ", nabarmendu du.

Horrenbestez, legebiltzarkide jeltzaleak uste du beharrezkoa dela haur eta nerabeen abusu-arazo larriaren garrantzia agerian uzten duten estatistika zehatzak izatea. "Errealitate hori argitzeaz gain, gizarte osoa sentsibilizatu eta ahaldundu nahi dugu, balizko abusu-kasuak detektatzeko, erreakzionatzeko eta laguntzeko", esan du.

Azkenik, aldaketa esanguratsu bat lortzeko helburuarekin, legebiltzarkide jeltzaleak azpimarratu du funtsezkoa dela biztanleria zaurgarri honekin lan egiten duten eta harremana duten pertsona guztiei baliabideak ematea, prebentzioa, detekzio goiztiarra eta prestakuntza maila guztietan indartuz. "Erakunde guztien konpromisoa ez ezik, gizarte osoaren lankidetza aktiboa ere eskatzen da, konponbidea etorkizuneko belaunaldien ongizatea babesteko eta bermatzeko ahaleginak batzea dela aitortuz", amaitu du Eva Juezek.